John Lie

Laksamana Muda TNI John Lie Tjeng Tjoan utawi Jahja Daniel Dharma (1911-1988) inggih punika pahlawan nasional Indonésia saking Manado. Dané kadadosang pahlawan nasional madasar antuk Keppres nomer 58/TK/2009 ring pinanggal 9 Novémber 2009. Daweg alit, dané mapeséngan John Lie tur meled pisan dados kaptén kapal. Sasampuné dané duur, dané dados pamucuk kapal perang RI Rajawali. Sadurungnyané, dané dados kaptén sané kasub nelusup ring prajurit segara Belandané ngalinggihin kapal The Outlaw. Daweg punika, BBC nyengguh ragané the black speed boat tur pers duranegara nyambat dané the great smuggler.

Laksamana Muda TNI (Purn.) John Lie Tjeng Tjoan 李約翰
Informasi pragaan
Embas	Lie Tjeng Tjoan 李約翰 (1911-03-09)9 Maret 1911 Manado, Sulawesi Utara, Hindia Belanda
Séda	27 Agustus 1988(1988-08-27) (yusa 77) Jakarta, Indonésia
Rabi	Margaretha Dharma Angkuw
Rerama	Lie Kae Tae (bapak) Oei Tjeng Nie Nio (ibu)
Penghargaan sipil	Pahlawan Nasional Indonésia
Dinas militer
Pihak	Indonésia
Dinas/cabang	TNI Angkatan Laut
Masa dinas	1945 – 1966
Pangkat	Laksamana Muda TNI
Komando	PPB 58 LB / The Outlaw
Partempuran/yuda	Revolusi Nasional Indonésia

Dawegé Alit

Jahja Daniel Dharma mawasta John Lie Tjeng Tjoan daweg dané alit. Embas dados oka kaping kalih saking kutus sameton pinaka sanak Lie Kae Tae miwah Oei Tseng Nie. Ajin dané, Lie Kae Tae, nuwénang perusahaan pangangkut Vetol (Veem en Transportonderneming Lie Kae Tae) sané kasub sadurung Yuda Jagat II laut kararianang sasampun dané padem duk warsa 1957.

Saking yusa alit, tresnan dané kapining jalajagat meled pisan. Kapertama, danjala ngamolihang paplajahan ring Hollands Chinese School (HCS) laut ngalanturang ring Christelijke Lagere School. Kahyun dané manados juru layar sayan nincap. Nika mawinan ring yusa 17 dané matilar saking manado nuju Batavia (Jakarta mangkin). Irika dané nyarengin kursus navigasi tur kadadosang Klerk Muallim III ring KPM (Koninklijk Paketvaart Mattschappij), silih sinunggih perusahaan palayaran Belanda. Sasampun makudang-kudang kala magentos kapal, dané matugas ring MV Tosari sané ring Pébruari 1942 makta dané ring Pangkalan AL Inggris ring Koramshar, Iran. Daweg punika, Yuda Jagat II sedek amuncak. MV Tosari kadadosang kapal logistik panyokong bala wadwa Sekutu. Sami angga kapal MV Tosariné, taler John Lie, kaicén pelatihan militér.