Emoni Band

Emoni Band inggih punika silih tunggil grup musik sané wénten ring Bali. Grup musik puniki wantah campuran musik tradisional Bali miwah musik modérn. Emoni Bali akronim saking Ethnic Harmony Bali. Emoni Band nganggén téma tembang raré utawi gending anak-anak. Grup musik puniki mawit saking sekaa utawi grup kesenian ring Fakultas Teknik Univérsitas Udayana, Sekaa Kesenian Parasu Geni. Tiosan nganggén alat musik modérn, Emoni Band nganggén alat musik tradisional makadi rindik, gangsa, kendang miwah seruling. Grup band puniki nembangang malih gending-gending raré nganggén nada sané modérn. Saking Emoni Band, gending-gending raré prasida kauningin olih krama Bali.

Anggota Band

Grup puniki madué anggota band sané kepah dados kakalih inggih punika modérn miwah tradisional. Anggota band modérn inggih punika A.A. Gedé Raka Gunawarman ring gitaris & vokalis, IGA Gedé Prama Sastrawan ring perkusi & vokalis, Agus Anwar Eka Wahyudi ring gitaris, miwah Ida Bagus Yogi Pratama ring bassis. Anggota sané dados penabuh inggih punika A.A. Ngurah Edy Prayoga ring (gender, rindik, suling), A.A. Ngurah Aritama (gangsa, suling), I Madé Dony Swiyoga Putra (gangsa, suling, kendang), miwah I Wayan Deny Yoga Pratama (gangsa, suling). Anggota Band puniki mawit saking sekaa kesenian sané pateh tur sampun ngaryanin musik saking lami.