Batik Tanah Liat

Batik Tanah Liat utawi ring basa Minangkabau kawastanin batik tanah liek inggih punika soroh batik sané mawit saking Minangkabau. Batik puniki nganggén tanah liat dados warnannyané. Carannyané inggih punika sané kapertama, tanah punika karendem sawatara aminggu nganggén tanah liat. Salanturnyané kaumbah tur kaicénin warna alami sané mawit saking entik-entikan.

Lelintihan

Batik Tanah Liat mawit saking Tiongkok, tur nglimbak ring Minangkabau ri tatkala abad ka-16. Ring galah punika Kerajaan Minangkabau mapusat ring Pagurung, Batusangkar. Batik Tanah Liat punika naenin ical ring masa penjajahan Jepang, nanging krana utsaha Wirda Hanim, téknik batik puniki kasobyahang ring warsa 1994. Mulanyané Wirda Hanin nyingakin motif puniki kaanggén olih makudang-kudang krama ring nagari Sumanik, Kecamatan Salimpaung, Batusangkar, Kabupatén Tanah Datar, Sumatra Barat. Dané seneng ring batik sané langka punika, tur mautsaha antuk nglimbakang malih seni tradisional batik Tanah Liat punika.

Motif

Motif batik Tanah Liat tradisional inggih punika kuda laut miwah kedis hong, nanging ring galah puniki, lianan saking motif Tionghoa wénten taler motif minakadi siriah dalam carano, kaluak paku, kuciang tidua, lokcan, batuang kayu, tari piring, miwah motif kipas. Ring galah puniki wénten taler motif-motif baru sané kasobyahang tur kaambil saking kekayaan budaya alam Minangkabau, sakadi motif tabuik (tabut), Jam Gadang miwah Rumah Gadang. Mangkin wénten tigang sentra ngaryanin batik Tanah Liat inggih punika ring Kota Padang, Kabupatén Pesisir Selatan miwah ring Kabupatén Dharmasraya. Ring sentra-sentra punika wénten corak druwénnyané sané manut saking lingkungan soang-soang. Ring sentra Dharmasraya wénten motif baru, inggih punika bunga sawit.

Pawarna

Silih tunggil sané unik ring batik Tanah Liat punika inggih punika bahan-bahan pawarna sané kaanggén mawit saking pawarna alami sakadi tanah liat, kulit jengkol (Pithecellobium jaringa), manggis (Garcinia mangostana), getah gambir (Uncaria gambir), jerami padi (Oryza sativa), kulit mahoni (Sweetenia mahogani), kulit rambutan (Nephelium lappaceum) miwah entik-entikan tradisional sané kaanggén antuk pawarna.

Penghargaan saking UNESCO

Batik Tanah Liat ngamolihang penghargaan saking Organisasi Pendidikan, Keilmuan, miwah Kebudayaan PBB (UNESCO) dados Masterpieces of the Oral and Intangible Heritage of Humanity saking bulan Oktober 2009. Batik puniki nénten ketah dados tradisi saking Jawa manten, batik punika taler dados produk kabudayan Minangkabau (Sumatra Barat).