Balé banjar

Balé Banjar inggih punika silih tunggil wewangunan sané wénten utawi sané kadruénang olih soang-soang banjar adat ring Bali. Balé banjar puniki madué kawigunan pinaka genah krama banjar ngamargiang parikrama sané maiketan ring parikrama adat utawi sosial. Balé banjar taler madué cihna pinaka simbol politik, identitas, miwah semangat krama banjaré. Akéh taler wewangunan sané maiketan ring balé banjar sekadi Pura Banjar, balé kulkul, perantenan, miwah sané lianan. Ring aab jagat sekadi mangkin, kawéntenan balé banjar sayan akéh madué bebuat ring kauripan para kramané.

Yéning sakadi dumun balé banjar tuah kaanggén ring parikrama banjar adat utawi genah parikrama paruman (kegiatan sosial - politik), yéning mangkin kawigunan balé banjar nglimbak ring kawigunan sosial, seni, ngantos ekonomi. Silih tunggilnyané ring Kota Denpasar, akéh balé banjar sané kadadosang genah maadolang, genah parkir, uatwi genah koperasi. Ring desa tiosan sakadi ring Ubud, balé banjar kadadosang genah malajah senam olih para wredhané, genah makarya ogoh-ogoh nyanggra panyepian olih para yowana, miwah genah mikélingang wanti warsa Sekaa Teruna Teruni. Balé banjar taler kaanggén genah ngamargiang parikrama PKK, Posyandu, genah malajah magambel utawi ngigel, miwah parikrama pasraman. Cutet ipun balé banjar punika pinaka genah utama utawi pusat ngamargiang saluiring parikrama ring banjar adat olih para kramané.