Bakar Batu

Bakar Batu (aksara Bali: bakaŕ​batu) inggih punika silih tunggil tradisi penting sané wénten ring Papua. Wentuk tradisi Bakar Batu inggih punika para kramané irika masak sinarengan tur matetujon antuk ngaturang suksma tur makumpul sareng kulawargané. Tradisi punika taler kalaksanayang antuk nyambra karahayuan sakadi wénten sané embas, wénten pawiwahan, wénten panobatan kepala suku,tur antuk ngumpulang prajurit sané jagi perang. Tradisi Bakar Batu ketahnyané kalaksanayang olih suku pedalaman utawi pegunungan, sakadi Lembah Baliem, Paniai, Nabire, Pegunungan Tengah, Pegunungan Bintang, Jayawijaya, Dekai, Yahukimo, tur sané lianan. Tradisi punika kawastanin Bakar Batu krana ring tradisi punika kramané makar batu ngantos panes, salanturnyané batu sané sampun panes punika katumpuk ring ajeng ajengan sané sampun kamasak. Yadiastun ring soang-soang genah utawi suku punika wastan tradisi punika malianan, sakadi Gapiia (Paniai), Kit Oba Isogoa (Wamena), miwah Barapen (Jayawijaya).

Tradisi Bakar Batu

Upacara

Pah-pahan saking tradisi Bakar Batu, inggih punika:

1. Batu katumpukin ring ajeng genah makar,bakar ngantos kayu bakar punika kabakar, tur ngawinang batu sané katumpuk dados panes.
2. Sinambi punika, kramané nyongcong tanah ngantos dalem.
3. Batu panes punika kagenahang ring song sampun kalaasin olih don biu miwah padang.
4. Ring ajeng batu panes utawi kebus punika katumpukin olih don biu, tur di ajengnyané kagenahang ulam babi sané sampun kairis.
5. Ring ajeng ulam babi punika katutupin olih don biu, salanturnyané ring ajengnyané malih kagenahang batu panes miwah katutup nganggé don.
6. Ring ajeng don punika, kagenahang ubi, séla, miwah jangan tur katutup malih nganggén don.
7. Ring ajeng don sané pinih ajeng katumpuk malih nganggé batu panes tur pinih untat katutupin don biu miwah padang.

Babi sané kamasak nénten langsung kapotong, nanging kapanah sadurungnyané. Yening babi punika raris mati, nika nyihnayang acara punika pacang mamargi antar. Nanging, yéning nénten raris mati, nika nyihnayang acara punika nénten pacang mamargi antar. Sasampun ulam punika lebeng, ketahnyané kamasak kirang langkah siki jam. Salanturnyané makasami kramané makumpul tur magi ajengan antuk kaajeng sinarengan ring lapangan madyan désané, nika prasida ngrumaketang rasa manyamabraya krama irika. Ngantos ring galah puniki, tradisi Bakar Batu kantun kalaksanayang miwah nglimbak tur kaanggén antuk nyambra tamiu penting sané rauh mirika, sakadi bupati, gubernur, présiden, miwah tamiu penting sané lianan. Ring krama pedalaman Papua sané maagama Islam utawi ri tatkala nyambra tamiu muslim, ulam babi punika dados kagentosin ngangén ulam siap, sampi, utawi kambing. Ulam punika taler prasida kamasak mapisah sareng ulam babi. Ketahnyané ulam lianan punika kamasak olih krama adat Walesi ring Kabupatén Jayawijaya antuk nyambra Bulan Ramadhan